- Студий шке пашажым могай ийыште тӱҥалын? Икымше ошкылым кӧ ыштен?

- Морко район тӱвыра пӧлкан вуйлатышыже Анатолий Александрович Александров ожнысо марий тӱрым тӱрлен моштышо мастарым шуко жап кычалын. Тыге Чодыраял тӱвыра пӧртыштӧ арулыкым эскерышылан пашам ыштыше А.Р.Поликарпова дене мутланен келшымеке, студий шке пашажым 1993 ий ноябрьыште тӱҥалын. Тиде сомылыш Анастасия Романовна шке мастарлыкшым уло кумылын пыштен. Аважын пашажым ончен, Валя ӱдыржат марий тӱрым тӱрлаш, вынерым куаш кумылаҥын. Икымше ошкылым «Тӱрлемӱдыр» студийлан Анастасия Романовна ден Валя ӱдыржӧ пыштеныт.

- Коллективыштыда кызыт мыняр еҥ тырша?

- Нылытын улына. Мария Тимирбаевна Васильева – студийым вуйлатыше, Эльвира Сергеева, Лена Петрова - мастар тӱрлызӧ-влак, Галина Фёдорова - вынерым куышо. Коллективна кугу огыл гынат, паша лектышан лийже манынак тыршена. Морко тӱвыра пӧрт кажне ийын планым пуэн шога, тӱрлыман вургемнам тушко пуэна. Муралтен, веселитлен тӱр тӱрлалтеш, тыге паша кечына моткоч писын, веселан эрта.

- Ик марий костюмым ямдылаш тыланда мыняр жап кая? Тиде костюм мыняр акыш шуэш?

- Вик ойлаш гын, тидлан кок тылзе жап кая. Тиде костюмлан кок тылзе жапыште ик еҥ шке пӱжвӱдшым пышта. Тичмаш костюм комплект вич тӱжем теҥгеш шуэш. Тиде окса марий еҥлан кугун чучеш гынат, заказ-влак шуко улыт. Кӧ марий йӱлам йӧрата, шке чонжым марий тӱрым ончен куандара, тудо тыгай костюмлан заказым ышта. Марий тувырым ме тыгак ансамбль, туныктышо-влаклан ямдылен шогена.

- Пеш моторын тӱрледа. Шкендан пашадам иктаж выставкыште ончыктенда мо?

- Шуко вере миен коштынна. Теве «Марий вургем» выставкыште кажне гана лийына. 1997 ий февральыште «Калык самодеятельный коллектив» лӱмым налме. Тыгак тыште пашам ыштыше ӱдыр-влак «Тӱрлемӱдыр» ансамбльын участникше улыт. Студий моткоч шуко грамот да диплом дене палемдалтын.

-  Студийым могай шонымаш дене чумырымо?

- Мемнан студийын цельже коча-кованан мондалт толшо вургемыштым уэмден, калык коклаш шарен да самырык тукымым тиде паша деке кумылаҥден шогаш. Экскурсий дене толшо-влаклан шке паша лектышнам ончыктена, школышто тунемше-влакат тӱрлымынам ончаш чӱчкыдын коштыт. Кӧн кумылжо уло, пырля тӱрлаш, вынерым куаш туныктена.

- Очыни, тиде паша тыланда моткоч келша?

- Келша манашат, ок келше манашат огеш лий. Вет кеч-кунамат ойлат: «Тунемме паша нигунамат ок мондалт». Шке чапнам, кумылнам тиде сомыл дене кылдыме, садланак таче кечынат тиде пашаште улына.

Тыланда, пагалыме лудшына-влак, марий костюм кӱлеш гын, толза «Тӱрлемӱдыр» студийыш. Тушто тендан кумылдам огыт волто. Да ида вожыл марий вургемым чияш.

Марина Трофимова,

МарГУ, 2 курс.

Авторын фотожо.