Самырык пагыт – айдемын илышыштыже эн сылне жап. Тудо пеш писын да шижде эртен кая гынат, уло илышланна негызым ышта.  Лач тунам ме шкаланна ончыкылыкым чоҥена: профессийым ойырен налына, ешаҥына. Но эн тӱҥжым  шотыш налын огына шукто, шонем. Вет ты пагытыштак тӱняумылымашна, чон кӧргӧ поянлыкна тапталтеш. Варажым тудо илышнан рӱдыжӧ лиеш. 

Мыйым, тыглай ялысе марий рвезым, ала-могай Юмо шке жапыштыже Марий кугыжаныш университетыш конден, варажым журналист корныш шогалтен. Икымше паша верем республикыште самырык-влаклан лекташ гына тӱҥалше «Кугарня» газет редакций лийын. Тунамат да варажымат эре пеленем чолга да ушан-шотан марий ӱдыр-рвезе-влак пашам ыштеныт. Чынжым гын, мый нунын пелен лийынам, нунын дечын шукылан тунемынам да кызытат тунемам.

Теве, коло ий наре эртымеке, илыш пӧрдем мыйым угыч «Кугарня» газетыш кондыш. Жапше эрта гынат, чон дене эре самырык улмыла чучеш. Кызытсе у тукымын шӱлышыжым да шонымашыжым умылем, шонем. А тӱҥ редактор семын мутым пуэм: «Кугарня» самырык тукымын да чон дене самырык улшо кажне марий еҥын йӧратыме газетше лийже манын, уста пашаче коллектив дене ончыкшымат  тыршаш тӱҥалына. А пагалыме лудшына-влакым йодам: кӧн могай темлымашыже але шонымашыже лиеш, редакцийышкына толаш, йыҥгырташ але серышым возен колташ ида ӧр. Марий калык манмыла, ик уш сай, шукыжо путыракат сай. Адакше келшымаште – вий.

Михаил Матвеев,

«Кугарня» газет редакцийын директоржо- тӱҥ редакторжо.