Кодшо кечылаште тыгай лӱман журналын икымше номерже ош тӱням ужо.

Тӱрлӧ чиян, калыкнан илышыж нерген каласкалыше тыгай журналым тений апрельыште эртыше Марий калыкын VIII Погыныштыжо ямдылаш темлыме ыле. Тевыс ынде у пашан лектышыжым ужына.  Тудо Марий Элыште веле огыл, моло кундемыштат илыше марий-влакын илышыштым, пашаштым, лектын шогышо йодышыштым почын пуаш тӱҥалеш да марий-влак илыме верлашке колталтеш.

 60 лаштык дене савыкталтше икымше номерын содержанийже поян. Тыште тӱрлӧ тема уло: VIII Марий Погын, Марий Юмынйӱла, Йошкар-Ола, марий учебникым кушто муаш лийме нерген, тыгак «Ме финн-угор улына», «Марий-влак Россий мучко илат», «Историй» да молат.

Лишыл жапыште журналын икымше номерже марий-влак илыме чыла кундемыш миен шушаш.