«А-а-а. Йӱштӧ!» - манын, кок кидкопам ваш йыгалтен, шокшо коҥга воктек лишемына. «Теле йӱштӧ коҥгамбак кӱзыкта», - манеш марий калык. Чынак. Йӱштӧ толмо дене чылан шокшо верым кычалына. А чоныштынаже куан чӱчка огыл мо? Йыгыжтарен пытареныт ыле шыжын шем тӱсшӧ, ночко лавыраже. Кумылна шукертак ош тӱсым, пӧршан пушеҥгым, йолйымалне лум кочыртатымым, Йӱштӧ Кугызан окнасе сӱретшым да уремыште ошкылмо годым шӱргынам чывышталмыжым йодын. Вучен шуктышна! Икте веле куанымашнам ӱмылта – лум шагал. Ох, кызытак лумым пӱтырен кондышо поранет тарваныже! Тудым ончаш мемнан семынак шукын уремыш куржын лектыт да виян мардеж ваштареш шогалын, поран дене ӧндалалтыт ыле, векат. Лумпураклан чурийнам почын, ласкалыкым вучышыла, шинчанам кумена... Могай сай! Йӱштӧ дене чеверген пытыше чурийым шыма лумын ниялтымыже аван кидшым ушештара.

Йоча-влаклан курыкышто мунчалташат лум пе-е-еш шагал. Ньога-влакым чаманет веле. Кызыт икшыве-влак курык гыч мӧҥгӧ ияҥ пытыше лум чуҥга огыл, а лавырген, пуракаҥ веле толын пурат. Ала-молан йоча пагыт поснак телым чӱчкыдын шарналтеш. Луман жап йомакым ушештара да, очыни. Адакшым телым Йӱштӧ Кугыза ден Лумӱдыр йоча-влаклан, чынжымак, йомакым пӧлеклат. Пӱртӱсшат пуйто юзыш савырна. Пушеҥге-влакым пӧршаҥда, йылгыжше кужу-кужу алгам чикта, окналам ош сӱрет дене петыра, уремыш ончалаш изи рожымат огеш кодо, яндасе тӱрым ончен, туштым веле туштыкта. Шоналтет да иктешлымашыш шуат: Россий калык эн поян, вет ме кажне кум тылзе гыч тӱрлӧ пагытым вашлийына, нунын моторлыкышт дене шкеннам куандарена.

Уремыште йӱштӧ шога, но тудым шӱм-чонышкыда огыда пыште манын ӱшанена. Икте-весыдам шокшо кумыл, поро шомак, ныжыл ончалтыш дене ырыктыза!

Тиде арнян Марий Элыштына 30-35 градус йӱштӧ шоген. Каныш кечылаште игече левештышаш. Синоптик-влакын ойлымышт почеш, декабрьын кокымшо пелыштыже тале лум лумаш тӱҥалеш. Тылзе мучашлан лум кӱжгыт 20- 30 сантиметр лийшаш.

Алевтина Васильева.

Е.Никифоровын фотожо.