Ӱдыр-рвезе-влакым йоҥылыш корныш шогалме деч «Варяг», «Сармат», «Скиф», «Феникс» военный ден патриот клуб-влакат мыняр-гынат утарат. Нунын пашаштым Афганистан ветеран-влакын РФ-ысе ушемыштын Марий пӧлкажым вуйлатыше Александр Питателев виктара. Йошкар-Оласе 20-шо №-ан школ пелен 7 ий наре лийше «Варяг» (кызыт пӧлем деч посна кодын) тиде тунемме верыште шинчымашым погышо ятыр йочам шке помышышкыжо налын. Ты радамышкак Настя Петухова (снимкыште) логалын.

Таче республикысе Торговля ден технологий колледжыште тунемше Настя «Варяг» клубыш ныл ий утла коштеш. Тиде пагытыште изи огыл кӱкшытыш шуын. Ӱдыр «Третья классность», «Долг и честь», «За прыжки с парашютом», «Россия» значок-влак дене палемдалтын. Кызытсе пагытлан эн кугу сеҥымашыже: канде берет. Тудым Н.Петуховалан ӱмаште Десантник-влакын Российысе ушемыштын Марий пӧлкажым вуйлатыше Марсель Фаткуллин кучыктен.

Десантникын канде беретшым гражданкыштак йоча-влаклан кучыктымашым тӱрлӧ еҥ тӱрлӧ семын акла. Туге гынат тиде ӱдыр-рвезе-влакым ончыкшымат пеҥгыде лияш, сай да пайдале пашам шукташ тарата. Теве клуб гоч эртыше рвезе-влак Шочмо элым аралымаште шке чапыштым кӱшнӧ кучат. Да тыгай беретым сулаш шуко чытымаш, мастарлык, кумыл кӱлыт, тыгодым шке шонымашке каен моштымаш кугу верым налеш. А кеч-момат илышыш шыҥдарымаште воктен улшо ӱшанле, ушан-шотан, весым умылышо, тура ой-каҥашым пуышо йолташ полша. Настя Петухова шапашыште улшо майор А.В.Питателевым кокымшо ачаж гаяк ужеш.

- Канде беретым нумалмаш – чап. Тудын дене мый кугешнем да ончыкшым военный лиймем шуэш, - каласкала Настя.

Ӱдыр беретан лияш манын, шуко тергымаш гоч эртен. 2005 ийыште клубыш толмекыже, тудлан вигак «салтак корныш шогалаш» логалын. Моло самырык еҥ дене пырля Медведево районысо Силикатный посёлко воктенсе Кундыш эҥер гыч Яльчик станций марте 200 наре меҥгым лӱдде ошкылын, йолвундаш тӱрыс вӱдотызан лиймешке. Тӱрлӧ чаракан йолгорным эртымаш, нушкын кайымаш, кӱшнӧ кечыше пырняшке урла кӱзымаш, ер йыр вич меҥге дене куржталмаш, лӱйкалымаш, автоматым рончымаш да чумырымаш, парашют дене тӧрштылмаш, парашютым погымаш, палаткым шындымаш... Нинын кокла гыч ятыр сомылым кажне ийын Звенигово районысо Ший ер воктене верланыше палатка лагерьыште шукташ логалеш. Ер декат 12 меҥгым ошма дене йолын ошкылаш перна. Но чылажымат тений эсогыл 9 ияш икшыват вуйым, нерым шупшде эртен.

«Варяг» клубыш Настян 11 ияш Толя шольыжат коштеш. Тудо акаж семынак тырша. А ӱдыр тышке эше келшыме рвезыжым почешыже конден. Миша Сорвачёв (снимкыште) – кызыт армийыште, десантно-штурмовой батальонышто служитла. Тудат – канде беретан.             

Ойлат, армий нӧргӧ рвезе гыч пӧръеҥым ышта. Тидыже Юж десант войскаште утларак виян да раш коеш. Вет тушто ик эн неле илыш пӧрдем гыч лекташ туныктат. Ӱдыр-влаклан тӱҥ шотышто ВДВ-ыште служитлыше самырык еҥым таҥлан кучаш келша, но южышт кок гана парашют дене тӧрштышӧ (кумшо гана августышто тӧршташ шона) Настя Петухова гай шкештат пеҥгыде, таза, виян, чолга лийнешт. Пайремда дене, канде беретан патырна ден моторна-влак! 

Эльвира Куклина.

Фото-влакым Н.Петухован альбомжо гыч налме.