Чодыра озанлыкын специалистше-шамыч МЧС пашаен да полшаш кумылан-влак дене пырля ынде визымше кече  Куяр лесничествыште (кызыт Кокшайск лесничествышкат куснен) рушарнян тўналше чодыра пожарым йєртат. Тудын амалже – калыкын тулым айда-лийже кучылтмыжо. Тидын шумлык вўргечын Марий Элысе чодыра озанлык министерствыште да изарнян Правительстве пєртыштє пресс-конференций лие. Марий Эл Правительстве пелен пожар ваштареш кучедалме шотышто штабым ыштыме. Тудым Марий Эл Правительство вуйлатышын икымше  алмаштышыже Н.И.Куклин вуйлата.

1 июльлан пожарын кумдыкшо 2500 гектарыш шуын. Йўла мемнан ик эн тўн поянлыкна – чодыра! Тулым йєртымаште кажне кечын 1000 наре ен тырша, йўдлан 200 наре ен кодеш. Россий МЧС-ын тўн управленийже гыч колтымо «Амфибия Бе-200» самолётат кок кече полшен, тыгак «Ми-8» кок вертолёт  лийын.

Чодырасе пожарым йєрташ неле. Тидым кузе ышташ кўлмым лач Чодыра озанлык министерствын специалистше ден лесникше-влак веле палат. Нунак  кызыт ты пашам вуйлатат. Пушенгын кўшыл ужашлаж дене кайыше тулым йєрташ эше ик пожарым ышташ да нуным вашла виктараш кўлеш, тунам веле «йошкар агытан» лыпланен кертеш. Адакшым чот шокшо игече, виян мардеж, кошкышо куп (тыгайже Марий Элыште шукертак лийын огыл) тулым йєрташ мешаят.

Кокшайск трассын ик ужашыжым транспорт-влаклан петырыме. Тыгак ты кундемыште верланыше Устье-Кундыш, Студёнка ялла, Сосновый бор посёлко да нунын воктен верланыше санаторий ден йоча лагерьла гыч ен-шамычым эвакуироватлыме. Чыла сай лиеш гын, лагерь-шамыч вес арнян пашам тўналыт.

Тений 30 июнь марте республикыштына 216 чодыра пожар лийын, 4 тўжем утла гектар ужар поянлык йўлен. Куд гана  тул волгенчылан кєра ылыжын. Молыж годым титакан – айдеме. Кызыт чодыраш пураш чарыме. Айста ты правилым огына пудырто, а тушко содыки кайымеке, тул дене огына мод. Шкенан кундемысе чодыра суртна гаяк. Айста тудым перегена!

Ирина Степанова.