Ираида Степанова, бизнес ӱдырамаш:

1.         Машинам - шем тӱсан «Лада Приора». Тудым эргым ойырен налын. Йӧнан машина, куштылгын кудалеш. Компьютер йӧн дене келыштарыме. Тӱжвал воштончыш-шамыч ырыкталтыт, да нуным автоматика полшымо дене савыркалаш лиеш. Тыгак шинчыме вер ырыкталтеш. Тидыже йӱштӧ годым моткоч сай. Яндам ӱштшӧ-шамыч шкештак игечылан келыштаралтыт. Мутлан, йӱр чотрак йӱреш гын, нуно писынрак пашам ыштат. Йӱр лыпланымеке, эркышнат.

2. Машинам 1977 ий годсекак виктарен моштем. Но тиде сомылым эре шуктен омыл. Сандене таче кугу опытем уке. Пытартыш жапыште олаштат, ола деч ӧрдыжтат кудалыштам, но кажне кечын огыл. Каныш годым ялыш, садыш корнем виктарем. Тунемме годым лӱдыкшын чучын, а уто нелылыкым шижын омыл.

3. Оҥай лийын, тунемме шуын. Машинам тек пӧръеҥ ачала. Ты сомыллан ынемат тунем. Мыйын тидлан эргым уло – Юмылан тау.

4. Эргымын сомылжо. Тудо мылам кеч-кунамат чыла шотыштат ямде, бензиным темыме машинам кучыкта.

5. Семым ом колышт. Корнышто тӱткырак лияш тыршем. Шкет кудалмем годым муралтем.

Наташа Пушкина, радиожурналист:

1. Визымше моделян «Жигули» машинам уло. Вишне тӱсан.

2. Стажем – кок ий. Мылам тунемаш неле огыл ыле. Теорийжат, практикыжат ик семын куштылгын ушыш шыҥеныт, садлан «неле» манше-шамычлан пешыжак ида ӱшане.

3. Машинам виктарымашым пӧръеҥ сомыл манын ом шоно. Вет илышыште ӱдырамашлан утларакшым шуко паша логалеш: я кевытыш кайыман да тушеч кугу сумка дене толман, я пазарыш, я вес верыш пурен лекман... Икманаш, машинат уло гын, чыла сомылат вашке шукталтеш.

4. Кеҥежым кажне кечын гаяк шке мушкам ыле, кызыт йӱштӧ да нигушто мушкаш, садлан тыгай пашам шуктышо организаций-влаклан (автомойка манына) ӱшанем.

5. Марий мурым колышт кудалам, утларакшым Станислав Шакировын мурымыжым йӧратем.

Марина Почтенева, актриса:

1. Машинам - кудымшо моделян ош тӱсан «Жигули». «Ласточка» манын лӱмдем, вет тудо мыйын икымше.

2. Такшым кок ий кудалыштам, но водитель удостоверений почеш - кумыт. Мыланем ик ий стажым правам налмем годым ешареныт: 2008 ий олмеш 2007 ий манын возен шынденыт. Изиэм годымак транспорт деке шӱмаҥынам. Шочмо ялыштем пӧртем деч тораштак огыл ферма ыле. Тушто «Беларусь» да «ДТ-25» трактор дене кудалыштынам. Сандене правам налаш кӱын шуынам ыле. Конешне, моткоч шуко правилым тунемман, тидыже изишак нелыла чучын. «Луч» автошколын озаже шочынжо мемнан ял гыч, сандене кушто шинчымашым погаш шонымаш вуйышто пӧрдын огыл: каенам да тунемаш тӱҥалынам.

3. Тиде пӧръеҥ сомыл манын, йӧршынат ом шоно. Тынар ӱдырамаш таче олаштына кудалыштеш да... Лачак айдеме шкаланже кугун ӱшанышаш. Мылам ты сомыл моткоч оҥайын чучеш. Южгунам корнысо инспектор-шамычлан актёр мастарлыкымат ончыкташ верештеш, шортынат колтет, тӱрлӧ семын кояш тӧчет...

4. Марием дене (артист Сергей Данилов – Авт.) коктын ик машина дене кудалыштына. Сандене черет дене мушкына.

5. Чӱчкыдынак радиом колыштам. Вич каналым эре пӱтыркалем. Кызыт марий муро диск дене ужалалтеш. А мыйжын аппаратурыжо тошто кассетан гына. Южгунам веле чӱктем.

Алевтина Таныгина (Васильева), журналист:

1. Шемалге-канде да варажым ший тӱсан «девяткем» лийыныт,  а кудалышташ тунемынам ужар тӱсан «шестёрка» дене. Кызыт машинам уке. Ала иктаж поян бизнесмен марий журналистлан ныл ораван йолташым пӧлекла ыле?

2. Машинам виктарышын праважым 2003 ийыште налынам. Теорийым тунемаш неле лийын огыл, но кудалышташ йӧсырак ыле. Поснак  скоростьым вашталтыме годым корныш ончымо олмеш рычагым шымленам. Тидлан инструктор эре шылтала ыле. Варажым, руль дек тунем шумек, кугурак скорость дене каяш тыршенам. Такшым писын кудалаш чот йӧратем. Поснак курык гыч кудал волымо годым шкемым кайык гай шижам.

3. Машинам виктараш пӧръеҥын сомылжо маныт, да нунышт чӱчкыдын руль воктек йӱшывуя шинчыт. Ик гана ялыште тыгай томашаш логалмек, шкаланем шке товатленам: машинам шке виктараш тӱҥалаш, пӧръеҥ-влаклан ӱшан уке. Олаш пӧртылмек, вигак тунемаш пурышым. Ӱдырамаш машинам садак шекланен, вашкыде виктара.

4. Машина улмо годым тудым эре пелашем мушкын.

5. Марий мурым колыштын кудалаш йӧратем. 

Анна Медведева, педагог:

1. Шымше моделян «Лада Жигули», канде тӱсан.

2. 15 ий. Тунемаш неле лийын огыл. Икымше машинам «Москвич» ыле. Первый жапыште ваштареш кудал толшо КамАЗ деч лӱдынам, пурла могырышкырак кораҥаш тыршенам. А кызыт стаж кугу, шкаланем ӱшанем. Корнышто иктаж-мо пудырга гын, шкеак ачалаш шотым муам.

3. Ӱдырамашын пашаже шуко, чылажымат писын ыштен шуктыман. Олаште ик пашадар дене гына илен лекташ огеш лий, сандене кок-кум вере тыршыман. Чылашкыжат жапыштыже шуаш манын, шке транспорт кӱлеш. Кеҥежым тыгак сад-пакчаш кажне кечын миен толман. Машина чыла нелылык гыч луктеш. Икмыняр ий ончыч шийвундо чӱдылыклан кӧра таксист семынат кудалышташ верештын. Машинамлан таум веле ойлем. Кызыт ынде эргым дене ик машина дене ӱчашен кудалыштына. (Воштылеш. – Авт.). Тудынат праваже уло. Эше вес машинам налаш шонена.

4. Шке мушкына.

5. Марий мурым колыштын кудалаш йӧратем, вет корнышто ончыкат, шола могырышкат да шеҥгекат тӱткын ончен кудалман.

Алёна Яковлева, мурызо:

1. Ший тӱсан луымшо моделян машинана уло, но шкемын личный машинам лиеш гын, эшеат сай ыле. Ош тӱсан «Митцубици ланцерым» налаш кугу шонымашем уло.

2. Ӱмаште июльышто правам нальым, тунем лекташ чот кумылаҥынам.

3. Йолын кошташ ӧрканем. Кызыт рульым ӱдырамаш-влак виктарат, пӧръеҥ гына кудалыштшаш манын ом шоно, тиде - кумыл паша.

4. Шкенан машинам пелашем мушкеш.

5. Марий мурым колыштына, тӱрлӧ нерген кутырена. Ончыкылык планым чоҥена.

Авторын да Е.Никифоровын фотошт.