19 мартыште марий писатель Валентин Борисович Исенековлан 75 ий темеш. Тудо Удмурт кундемысе Карагӧл районысо Шопкер ялеш шочын. Кыдалаш шинчымашым Татар кундемысе Буймо шымияш школышто налын. Вара Йошкар-Оласе культпросвет школышто, Н.К.Крупская лӱмеш Марий пединститутышто тунемын. Паша корныжым 1952 ийыште Юл эҥерыште шолым волтымаште тӱҥалын. Вара шочмо ялыштыже клуб вуйлатышылан тыршен. Йошкар-Оласе ик заводышто пашам ыштен, Провой кундемысе «Передовик» райгазетын литсотрудникшылан шоген. 1967 ийыште «Ямде лий!» газет редакцийыш толын. Арня еда йоча-влаклан лектын шогышо ты газетыште ӱмыржӧ мучко пашам ыштен.

Почеламутым 1952 ий гыч возаш тӱҥалын. Икымше сылнымут саскаже-влак «Рвезе йӱк» книгаште савыкталтыныт. 50-ше ийлаштак «Ончыко» журналыште тудын «Вӱд ӱмбалне» да «Капар тукым» повестьше-влак лектыныт. «Ямбердинын дневникше» повестьше 1977 ийыште Йошкар-Олаште посна книга дене савыкталтын.

В.Исенековым шукынжо йоча писатель семын палат. Вет тудын пашаже икшыве-влакын илышышт дене кылдалтше лийын. Редакцийыште серыш пӧлкам вуйлатыше семын чӱчкыдын школлашке пионер организаций-влакын пашаштым ончалаш лектеден. Тыгак шымлымаш пашамат шуктен. Марий АССР-ын калык писательже Никандр Лекайнын усталык биографийжым радамлен. Кугу Отечественный сарыште лийше марий писатель-влак нерген «Арслан тукым» сылнымутан очерк-портрет сборникым ямдылен.

В.Исенековын землякше Р.И.Токмурзин писатель нерген сылнын сӧрастарыме кок кугу фотоальбомым чумырен. Нуным автор Карагӧлысӧ краевед тоштерыш аралаш пуэн. В.Исенековын тӱрлӧ фотоснимкыжым, документшым Токмурзин писательын пелашыж деч йодын. Тудын дечак налме книгаже-влакым Роберт Ильич марий-влак тӱшкан илыме Буймо, Кӧлегеш, Пелемеш, Байтуганово, Ныргындыш, Пыргындыш ялласе школыш пуэн. Тыгак Карагӧл селасе краевед тоштерыш Р.И.Токмурзин ик ий ончыч В.Исенековын «Мемнан Мики», «Вӱд ӱмбалне», «А гыч Я марте», «Рвезе йӱк», «Ямбердинын дневникше» книга-влакым пуэн.

Роберт Токмурзин шкежат Валентин Исенеков дене Йошкар-Олаштат да шочмо-кундемыштыжат ик гана веле огыл ужын кутырен. Тудо писательым шуко палыше, пашам йӧратыше, поро кумылан да кеч-кунамат нелылыкыш логалше еҥлан полшаш ямде койыш-шоктышан айдеме семын шарналт кодын манын, мемнан редакцийыш колтымо ик серышыштыже возен. Нуно пытартыш гана Йошкар-Олаште Марий паркыште «Ныргындыш сем» фольклор коллективын  концертшым ончыктымо годым ужыныт. Тунам Валентин Борисович шочмо-кушмо кундемже гыч толшо ансамбльын мастарлыкшылан моткоч куанен, мокталтен ойлен, ты фольклор коллективын Шарнымаш книгашкыже йошкар ручка дене сай, шӱм гыч лекше шокшо мут-влакым возен. Ты серымаш пытартыш лийын.

Валентин Исенеков 1988 ийыште илыш дене чеверласен. 

Ныргындыш гыч колтымо Р.И.Токмурзинын серышыж негызеш А.Таныгина марлаҥден серен.