«Кугарня» газетын лекме кечынже, кугарнян, редакцийыштыже черетан у вашлиймаш эртыш. Ты гана Марий кугыжаныш университетысе журналистика кафедрым вуйлатыше, историй наука кандидат Олег Николаевич Тихонов дене мутым вашталтышна. Тыгак университетыштак воспитательный паша шотышто пӧлкам вуйлатыше Людмила Ивановна Кошкина дене шинчаваш кутыраш оҥай ыле.

«Кугарня» газет» ГУКП-н директоржо-тӱҥ редакторжо Михаил Матвеевын палемдымыжла, самырык-влаклан пӧлеклалтше газет ден Марий кугыжаныш университет иза-шольо але ача-эрге гаяк келшен, ваш полшен илышаш улыт. Вет редакцийыште тыршыше пашаеҥ-влак тӱҥ шотышто тиде тунемме верыште шинчымашыштым шуареныт да университетат, газет редакцият самырык тукым дене чак кылдалтыныт. Ты шотышто газет ден журналистика пӧлка посна сомыл-влакым пырля виктарышаш улыт. Теве редакций могыр гыч тыгай темлымаш уло: университетыште тунемше-шамыч «Кугарня» газетыште студент-влаклан пӧлеклалтше «Оҥго» (тудым вес семынат лӱмдаш лиеш) лаштыкым шкештак ямдылен кертыт.

А вашлиймаш годым О.Н.Тихонов каласкалыш: «МарГУ-со журналистика пӧлкалан тений 10 ий темеш. Ты пагытыште тушеч 140 самырык еҥ журналистлан тунем лектын, но нунын кокла гыч шагалжын пашаже тиде профессий дене кылдалтын. Тыгодым сай примерат ситышын. Тачысе кечылан тиде пӧлкаш тунемаш пураш конкурс уло. Кумылан-влак республика деч ӧрдыжтӧ илыше радам гыч шукемыт».

Палемдыме пӧлка кызыт Озаҥ университет дене пеҥгыде кылым куча, тудын пелен аспирантура уло. Тыгодым илыш ончыкта: вузлаште бюджет вер кажне ийын шагалем толеш. Илен-толын, мемнан кундемыштат бакалавриат да магистратура тунемме йӧныш тӱрыс куснат. А бакалавриат – тичмаш огыл кӱшыл шинчымаш, сандене умбакыже эше магистратурышто тудым шуарыман. Тушкыжо логалаш куштылгак огыл. Тыге школыштак келгырак да кумдарак шинчымашым налаш тыршыман!!!

Марий кугыжаныш университетысе илыш ик верыште огеш тошкешт. Воспитательный паша шотышто пӧлкат тыште кумда да ик эн кӱлешан паша-влакым виктарен шога. Мутлан, ялысе икшыве да молат психологий пӧлемыш тӱрлӧ йодыш дене толын кертыт. Туштак «Ӱшан» телефон уло. Студклуб, студент самоуправлений, куратор ден кажне деканын воспитательный паша шотышто алмаштышыже-влакын сомылышт, волонтёр виктыш... Школышто тунемше-влакым волонтёр-шамычак права шотышто палдарат. Университетыште спорт мероприятий-шамыч ятыр эртат. Теве кажне ийын ты пагытыште студент ден преподаватель-влак «Добрынинан ечыгорнышкыжо» шогалыт. «Самырык тукымын шонымашыже шуко. Нуным ужын да виктарен гына шукто», - палемда Л.И.Кошкина.

Кызытсе саман айдеме деч пӱсӧ уш-акылым, чулымлыкым, чолгалыкым йодеш, а илышын куатшымат, куанжымат мален шинчыше шижын огеш шукто. Тунем да шуаралт Марий кугыжаныш университетыште да «Кугарня» газет дене пырля!

  Э.Викторова.

Авторын фотожо.