Жанна ӱпшым ик чумыркаш погалтен, воштончыш йыр пеш пӧрдеш. «О, могай кужу ӱпем, шалатен колтем, пунем, чыла рвезым сымыстарем», - ковыртатыл мутлана ӱдыр. Ӱпетше кужу да... Молан ондак Гришын, вара Илюшын чоныштым когартышыч? Вес ӱдыр дене келшаш от пу, луген коштат. Теве адак рвезе-влак коклаште сырымашым веле луктыч. А шкеже ӧрдыж гыч нунымак воштылат: «О-хо-хо, мыйын верч тулыш-вӱдыш пураш ямде улыт. Ораде-влак, мыйже вет садак ӧрдыж велке марлан каяш шонем». Экономистлан тунем лекмекше, Жанна предприниматель лие. Ондак водительын праважым нале, шкеак машина дене кудалышташ тӱҥале. Ончыко ужын моштышо ӱдыр, нимом ойлаш!

Такшым чолгалыкше тӱргоч велалтеш. Келшен онча рвезе дене, огеш йӧрӧ, вигак шӱкалеш. «Мылам ньымызи да нечке полко огыт кӱл. Лийже пашаче, темпераментан!» - тура ойлен ӱдыр.

Жаннан шочмо кундемысе райрӱдыштӧ вургемым ужалыше кевытше уло. Кеч ӱдырамашлан, кеч пӧръеҥлан, тӱҥжӧ - налше-влак шукырак лийышт! Мотор бизнесменка сатулан кудалыштеш, а лишыл йолташ ӱдыржӧ кевытыште тырша.

Йӧратымаш янда гай: пудырга гын, ушаш йӧсӧ. Тудым жапыштыже арален кертына? Ешыште икгай пӱрымаш молан вашлиялтеш?  Вара тудо саҥгашкак возалтын мо? Рвезе ӱмырлан оза лияш кунам тунем шуктена? Шонен мо Орина уныкажат тудын гаяк корныш шогалеш манын?

- Мом тынаре вуйдымо пормыла кок могырыш пӧрдат, ындыже сита огыл мо? Лушко! Мондо! Айда шич ваштарешем, - вуеш шушо уныкажым лыпландарен ойлыш Орина. Тудо падырашыжым нигӧ деч коч умыла. Шкежат эргыжым еҥын марийже деч ыштен да садланак ала-мо? Мом ыштет, жап тыгай ыле. Сар каен. Эрге шочо. Ӱшанем, эҥертышем лиеш манын, шомакыш пурышо ӱдырамаш чонжым тыге рӱпшыш.

Ынде теве ала язык, ала пиал, тидак уныкажым «перен пуыш»... 

Кеҥеж чапле шогымылан кӧра пасушто тӧшак гай уржа нелемын кия. Тений игечыжат чот куандарыш. Вачешыже саважым пыштен, Орина шудо солаш ошкылеш. Колхоз паша деч вара шкаланже кеҥеж гоч ынде ик нумалтыш денак чумырыш. Иле шудым кунамже солен вигак, кунамже коштен конда. Солыкеш вӱдылалме кочкышыжым мландывак шаралтен пыштыш. «Мланде-Ава,  Чодыра Юмо, кид-йолем лывыртыза, вольыкемлан ситыше кургым погаш вий-алым, перкем пуыза», - пелештыш да кынел шогалын, саважым солалтыш. Чыж-чож шоктен, шудо корно возеш.